قصايد فزاع تحت الطلب

::

السلامـ عليكمـ و الرحمهـ

شحالكمـ !.

:: قصايد فزاع :ـ الشيخ حمدان بن محمد بن راش آل مكتومـ ::

.
.

من هو «فزاع»؟

أنا عنواني اشعاري واسمي في معانيها وأوّل بيت أنا قلته غدا تاريخ ميلادي
إذا تنشِدْ عن أخباري من اوّلْها لتاليها أنا اشعاري هي اخباري على ما اْريد تنقادي
وانا أمّي إماراتي ولِدْت وعشت أنا فيها وابوي أمجاد عرباني وطاري ماضي اجدادي
واخواني أنا المليار مسلم في أراضيها وانا القرآن والسِنّه غَدَوا زادي وزوّادي
أعيش هْمومي وفَرْحي ولا لي نيّه أخفيها وأكبر همّي المقدس وطفلٍ جنبه يْنادي
يهزّ بْصَرْخته أرضٍ نوى الصهيون يمحيها من التاريخ، والعالم وقَفْ مكتوف الايادي
وانا ايّامي هي اسْتاذي تعلّمني لياليها فلا خيرٍ بإنسانٍ يِفادْ ولا بَعَدْ فادي
و(زايد) قِدْوِتي (زايد) و(زايد) من يزهّيها بلاده شانها عالي باسمهْ دايمْ تْشادي
وروحي (محمّد المغوار) ابن راشد يغذّيها من أشعاره من أفكاره، بنيت بْمجدهْ امجادي
مرَبِنّي على الجودْ وعلى المعروف واحميها بلادي حبّي الأول ولا لي غيرها بلادي

.
.

(( العذر يابوي ))..

العذر يابوي لو ماشلني ساقي...
الحزن ما طاقني والقلب ما طاقه ..

ياعيني ابكي وساعدها يا خفاقي ..
ما هوب بعيبٍ يفيض الدمع ف احداقه ..

يا موحد الدار .. يالمتفرد الراقي ..
والغيم حزنٍ جذب الاحساس براقه ..

اشوف كن النهار يحدر احداقي ..
واشراقته ما تشابه أية اشراقه ..

ومن يعذل القلب عن ضيقته لا ضاقي ..
انسان مشكوك في مذهبه واخلاقه ..

ياحاكم الارض و أول وآخر اشواقي ..
يفداك قلبٍ حزن فرقاك ما ذاقه ..

في غيابك الناس ماتت وانته الباقي..
لأنك الغالي اللي يذبح فراقه ..

يبكيك من يغرس النخله على الساقي..
يبكيك راعي الشداد وراعي الناقه ..

والطيب والجود والعزه والاخلاقي..
والارض وترابها والبحر واعماقه ..

شيخٍ مقامه سكن ما بين الاعماقي ..
حتى الزمن من محبينه وعشاقه ..

.
.

خلاص يعني

خلاص يعني كل شَيّ انتهى وراح خلاص يعني ما بقينا حبايب
يعني وعودك كلها كانت مْزاح والاّ انت ما لك في المحبّه رغايب
وين العهود ووين لحظات الافراح يعني تلاشت مع هبوب الهبايب
القلب بعدك من له اليوم يرتاح من بعد ما هو في محبّتْك ذايب
ياما على شانك تحمّلت الاجراح وياما جروحي من صدودك عطايب
سرقتني عن جملة الناس يا صاح والفكر عندك ماخذنّه نهايب
خِلّك يحبّك يا بَعَدْ سِيْد المْلاح إن رحت عنّه راودنّه مصايب
خَلّك معه دام الهوى حيل نضّاح والواش رِدّه يا هوى البال خايب

.
.

ممنوع أخذ الثار

مهداه إلى اللواء ضاحي خلفان تميم

شكواي (بو فارس) على اللي سرَقْني دامك خبيرٍ في أمور الجريمه
شَخْصٍ أخَذْ قلبي وْصَدّ وْهجَرْني من بعد ما كِنّا نديم ونديمه
زَور ملفّات الغرام وخدَعْني بعد الأمور الواضحات السليمه
وافي أنا بْحبّه ولكن صدمني والله يا (ضاحي) صَدْمتي به أليمه
ياما جَرَحْ ناسٍ وياما طعنّي وياما نَهَبْ ناسٍ وْكلٍ خصيمه
لا تقول منّي، لا حَشَا هوب منّي ممنوع أخْذ الثار ثاري لزيمه
بْكَشْف الجريمه أمنكم ما لَحَقْني مجرم ما بين الناس هذي عظيمه
باعطيك من وصفه ودوّر وعنّي واعمل تحرّي فْ.. كل بيتٍ وخيمه
كانك لقيته لى شبيه الدمنّي أبو العيون الناعسات العديمه
أهو الذي بْحِسْنه يا (ضاحي) غلبْني ولا اظن ترضى لي أنا بالهزيمه

.
.

القضا بالقضا

لا تحاول تعيد بدمعتك ما مضى ما تداوي دموعك جرح طول البعاد
إنتهى الحب يا اللى بيننا وانقضى ولا بقى لك بقلبي غير ذكرى وداد
كنت أجيك بْخفوقٍ فيه حبّ ورضا وكنت انته حبيبي غايتي والمراد
وكنت أشوفك حياتي جوّها والفضا وكنت يومٍ تغيب آموت هَمّ وْ نكاد
بس خِذْها بْصَراحه القضا بالقضا ذوق كاسٍ شربته منْك اسمه عناد
يرفض القلب مثلك به ودادٍ حظى دامه انسان مثلك قطعةٍ من جماد
ما تعيش المشاعر في خفوقٍ فضى كيف تبني ودادٍ له عنادك عماد
يا فقير المشاعر، يا شتات الشظا المحبّه بوادي، وانت والله بواد

.
.

فارس إبن فارس

مناسبة القصيدة:
للفروسية ايقاعها وحضورها الآسر الجلي.. وهل يطرب لها.. غير العارف بقيمها وخصالها..ومعانيها؟!

حمدان بن محمد بن راشد آل مكتوم يرسم بالشعر أحداث فوز شقيقه أحمد بن محمد بن راشد آل مكتوم بالمركز الأول..في أسبانيا والزمان..زمن انهمار الشعر من الأب.. إلى الابن.. زمن المكارم المتوارثة أصالة وكبرياء.. حمدان شاعر وفارس أدرك قيمة النصر فمنحه زخم إبداع القصيدة وقوة حضورها البهي..

فز الشبل من صكّت الحلقه على الابطان يوم الشجاعة تنهزم وتزلزل الابطال
يومٍ تخربط يا عرب تتغيّر الأوزان رد الشبل في زمجره متحدّي الزلزال
فزّ الشبل (أحمد) بقوّه ترعب الميدان وذاك الأسد قايد يحرّك بيده الأشبال
وقام التحدّي في جبالٍ خوّفت فرسان و(احمد) بعزمه إنفرد وابعد شرات اللال
لا ما يهمّه صعب كل الصعب تحته هان والنصر ما جابه صدف جابه بطولة بال
يخضع له الفوز بفخر من سالف الأزمان تاجي وعزّي ومنهجي، يا غيثي الهمّال
شيخي وابوي (محمّد) اللي للنصر عنوان في عيونه يبان التحدّي والصبر وآمال
واحمد تعلّى واعتلى هو فارس الشبّان في عيونه يبان التحدّي والصبر وآمال
أنا اشهد انّه عاش ع صهوة فرس وعنان ولا يْبيّن الرجّال كود ان كان ابن رجّال
ولا اظن بان السيل يجري دونه الوديان وحنّا إذا قلنا تراه أقوالنا أفعال
مازان هو بالفوز والله الفوز باسمه زان يختال هو بالفوز.. لا إلفوز به يختال
المجد كل المجد من (أحمد) بنى له شان والعز كل العز من (أحمد) خصاله نال
ما خاب ظنّي فيه يوم الصبح نوره بان الصبح يفرح يوم شاف (احمد) بخيله صال
له غنّت حروف القصيده باعذب الألحان والنعم باحمد قلتها والحق به ينقال
فارس ابن فارس إذا قالوا فلان فلان أحمد بن محمد ابن راشد ياحيّ الفال
يومٍ عزيته فزّ قال انّي أخو حمدان أنا اشهد ان الفوز باهدي لك على كل حال

.
.

إلى (أمّي) .. مع التحية

وش خانة (دبي) وْبَحَرْهَا مادام شمس (دبي) ما حَدّ
تبكي فيافيها وشجَرْهَا والطير عيّا ما يغرّد
و(زعبيل) لى مظلم قصرْهَا ما به سوى صوت الصدى يْرِدّ
وِنْجوم تسأل عن بدرها لى ينير داجي الليل الاسود
يا شمعة الدار وسفرْهَا يا امّي من الشوق آتوقد
إن كان شِعْري ما حصرْهَا الاشواق تظهر في التنهد
تجيب لي النسمه عطرها لى يْغَار منّه فايح الورد
القلب ينبض به ذكرها وِطْيوفها في العين ترقد
الله يطولْ في عمرْهَا وتبقى لنا وبعمرها يمِدّ
وعساه ما يطولْ سفرْهَا وِلْنا بخير انشا الله تْرِد

.
.

أنا في الشعر..

أنا في الشعر ابن هذاك إذا إنته تعَرْف الشعر أهيجْ في البحور أمواج، أمشّيها على كيفي
واقول لك لا تجاريني ترى أمشي بدربٍ وعر واذا تبغي تجاريني ترى لك صامدٍ سيفي
ولا تضمن تحوز النصر وانا بحرٍ وانته نهر واذا عارضت تيّاري تبرّى موجي وْسِيْفي
وكم من واحدٍ غيرك تعرّض لي وجاه الكسر ودارت به هبوب رْيَاح في أقوى عواصيفي
تهاجم سايل الأقلام وسطرٍ ما يهزّه سطر وإنته وينها افكارك عن بْيوتي وْتهديفي
تبا روس العلا وانته تحوّل في طريقك حدر تحاول بس ما تِقْدَرْ بأن توصل مشاريفي
نجوم الليل ماتنوِرْ إذا بيّن شعاع البدر وش اللي يجمع الوسمي على سحب ورْعد صيفي
تشوف الجاذبيّه لي في هالدنيا تجرّك جر أنا عكسه أفرّك وين ما أبغي على كيفي

.
.

المنهل العالي

قصيدة مهداة لسمو الشيخ محمد بن راشد بمناسبة حصوله على المركز الأول في سباق ماراثون اسبانيا للقدرة

العظيم الله وانا مُؤمن بها كَلمة عَظيم والحياه بْها رسُل مع أنبيا وْصحب وْكرام
والكتب لي م السَما الإنجيل والعهد القديم والختم قرآن أنزل بين مَكّه والحرام
والرسول المصطفى محمد لنا خير وْنعيم كان أمّي وراعي اغنام وهدى بْنوره أنَام
والزمن دولات حكمه بين سين وبين جيم لارخت في يوم شَدّت حبلها تبغي المشام
عدْت اطالع في البدايه والنهايه والنديم وابن سينا وابن خلدون وْموطأ هَالإمام
البصيره لي تقود العقل للراي السليم ما يعرف النور شخصٍ جاهل بْأمر الظلام
التجارب معدن الرجّال بمْحَكّ الجسيم الجسيم اللي يفكّ عْقودها لو هي جِسام
ذاك حتى لو جلس الدرب بيده يستقيم واهَنيِّ الأرض تحته كلّ ماعزّم وقام
المحمد .. لي بحزمه عِلم يتسمّى حَليم حِلمه اللي بْحَدّ وبْحَدّه يحِدّ مْن الحَرام
المحمد .. الحكيم اللي به الحكمه تقيم لاعجب لو تعجب السبع العجايب به دوام
المحمد .. لو( حدايق بابل) توازيه غيم له حدايق شعر نرجس ما تغطّيها الغمام
و(المسلاّت) بْعلوّ نجومها رْجال وْحريم ما تعلّت فوق نجمه ساطعٍ لو قيل نام
وكلّها (اهرامات ) جيزه لي بها السِّر الكتيم رامها باخلاق سَمْحَه بَالصلاه وْبالصيام
وبرج (بيزا) كان هو يُحْسَبْ عجيبه للفهيم وش نسَمّيها بروجٍ ساسها كانت خيام؟!
وتاج علمه كالسّحَاب الموشلي مبسمه ديم لو (محل هالتاج) يوقف قال باوقف له نظام
وذاك (سور الصين) شُيّد من زمن قافٍ وميم عام ميتين وسبعتعشر على قيامه تمام
سوره الإسلام ممشى والصراط المستقيم كلمته موقف ماهي صوره تعلّق أو حمام
و(المناره ) قامها (بطلِيمُوس) بْوصفه زعيم عام ميتين وْثمانين وبقى منها الحلام
هالمناره لو درت بمحمد الشهم الشكيم ما اغفلت عن نورها لآخر مواعيد الضرام
هالعجايب لو هو ثامنها باقول الله عليم ما يكنّه من عجايب في معانيه ازدحام
ودّه وودّه ولكن الابجديّه كالنسيم ما توفّي و لا تكفّي لو بكفّه هالكلام
المحمد .. من علوّه ينهل البحر الكريم ومن سكوته في سكوته تقرا تاريخ الكرام
جيت له داعي أنا ما بين زمزم والحطيم ميم حاء وْميم شدّه وْدال رمزٍ للسلام

.
.

يتبع

.

.::.

.

صبري ملّني

لِمِّني في مَحْجَر عْيونك حبيبي وخلّني خلّني آشوف نفسي في عيونك واطمئن
دامِك إن سَلْهَمْت بالرمش الظليل تْفِلّني (لعنبو) ذا الرمش كيف انّي من اسبابه أجِن
حبّك اللِّي تَلّ قلبي من بَعَدْ ما تَلّني صِدْق أنا ميّت بحبّك كانها عيونك كَفَن
إجْمَعْ اللِّي باقيٍ منّي شتات ودلّني شوفني ذاك الغريب اللي يدوّر عن وطن
صَدّك اللي هَدّ حيلي والجفا لي علّني ليه قلبين المحبّه بالمحبّه ما الْتِقَن
قلت ابـ اصبر والصَبِر من زود صبري ملّني وقلت ابـ انسى واثر طيفك صار له عقلي سجن
ضاعت دْروب المحبّه والحزن ما ضلّني يا حسافه ذي الليالي.. ذي الليالي ما انصفَنْ
لا تهلّ دْموع من عينك أخاف تْهِلّني خايف أطْلَعْ من عيونك لا من فْـ يومٍ بكن

.
.

مستحيل أنساك

مستحيل أنساك هذا مستحيل مستحيل أنساك والله للأَبَدْ
من يعاشِرْ شخص مثلك ما يميل لا ولا ينوي على غيرك أحَدْ
يا جميلٍ في جميلٍ في جميل يا فريد اللون في جيدٍ وْخَد
ترتسِمْ في وجنتك شمس الأصيل وجمرتينٍ بينهن صَفّ الَبَردْ
والعيون الدعج والرمش الظليل ونور وجهك منّهن نور اسْتِمَد
تهت في حبّك مثل تُوْه الضليل وزادت جْروح الَحَشا جْروحٍ جِدَدْ
ولا ولا عن حبّك أرضى بالبديل وْكَنّ باقي الخود تكمالة عدَدْ
لي يسير الدرب يوصَلْ لو طويل أو مِثِلْ ما قِيْل من (جَدَّ وَجَدْ)

.
.

عَوّضوك بْغيابي

عَوّضوك ْبغيابي لا تقول انّي َوحَشْتك لا تجاملْ دخيلك في شعور يْعَنيني
بَسّ يكفي كفايه لا تمادى عَرَفْتك خَاين الحب مَا له في فوادي حَنيني
إنت ياللي بعيني حِلْم عمري رسَمْتك وكيف تجرح خفوق يعشقك من سنيني
أحسبه زاد حبّي في غيابي وْحسَبْتك ما تجاهَلْ وِدَادٍ كان بينك وْبيني
كَم سَهَرت الليالي وكم ليله سَهَرْتك وكم ليله خَيَالك نام في وسط عيني
وكم قل لي دخيلك كم ليل اْنتظَرتك كم قل لي تِفَضّل، كم صَدّك يجيني
كنت تجري بْدَمّي لا نزَفْته نزَفْتك كنت ساكن خيالي، داخلي مِحتويني
من كتَبْ الحروف الأبجديّه كتبتك "لامَه" إن كان تبغي أوَّلْ الحرف "سيني"

.
.

تواق

توّاق لك أشكي ولا زلت فزّاع لكن تبدلْ حال وابغيك تفْزَعْ
انت الذي لك رمز في كل مطلاع يوم الرجال تْحين (توّاق) يطلع
المجد لك يا فخر الامجاد ينصاع غصبٍ عليه وتحت رجليك يِخْضَعْ
والعز بامرك يا سنا العز مطواع ومن كان مثلك.. كان للعز مربع
غصت فْـ بحور الشِّعر لين اغزر أقواع ومنزلك عالي.. يا نجم فوق تلمع
الحر في المقناص معروف طَلاعْ وانت الفريد.. النادر.. الحر اْلاروع
كلٍ له اعجازٍ.. وكلٍ له ابداع لكنّك انته بالفعل صرت الابْدَعْ
لو باكْتِبْ مْن اليوم ويجف لِيْراع ما اظنّي أحصي كل ما فيك واجْمَعْ
ظبيٍ سَرَقْني.. ماخِذْ القلب بِخْداع حلوٍ وداده.. لكن القول يِخْدَعْ
كمٍ تحمّلته وكم جتني أوجاع !وانا ابتسِمْ له.. كيف والجرح يوجع
أبغي دخيلك آخِذْ الصاع بالصاع آخِذْ قضايه لين لِعْيون تِدْمَعْ
فزّاع يشكي لك.. ولا زلت فزّاع لكن تغيّر حال وابغيك تفْزَعْ

.
.

ثلاث أيّام

ثلاث ايّام مرّن في حياتي غير ثلاث ايّام عشت الحبّ واغليتك
ثلاث ايّام واتهجّى كلام الطير كلام أعْذَبْ من اعْذبْ من تفدّيتك
رسالة حبّ شاهدْها غلا وْتعمير على فْوادي تربَّعْ واسْكنْ فْـ بيتك
أقول إشْ قد انا عطشان وانت البير دَلو فكري نَضَحْ من كلمتي ليتك
أقول الـ(ما يصير) لْعينك انت يْصير ولو حتى بْثرّيا الكون حطّيتك
حبيبي والغلا صوره بلا تصوير صوَرْها بكل رَمشة عين أنا ريتك
حبيبي والعطا يحتاج للتقدير إذا صرّحت أنا اللي حّيك وْمَيْتك
ثلاث ايّام مرّن في حياتي غير ثلاث اّيام عشْت الحب واغليتك
ثلاث ايّام لكن ما ادري شِ التفسير بس.. ادري من ثلاث ايّام حبّيتك

.
.

تحلا بعيني

يا مشعل القلب تكفي خفّف شويّه القلب من كثر صدّك ويلي لْحاله
دامه يحبّك ولا له غيرك بْغيّه وش له تحطّه بدنيا الهمّ وتْناله
انته حبيبي لقلبي نوره وْضيّه تحلا بعيني وقلبي صِرْت تحلا له
وانته ربيع الخفوق وْشمسه وْفَيّه وان حبّ غيرك خفوقي باقطع وْصاله
ما اريد بك حَدٍّ وْلو هو كان حوريّه إنته مهَدّي الغرام وانت زلزاله
للموت انا لك حبيبي صورةٍ حيّه ميّت بحبك وحبّك صِرْت انا اسعى له
يا بو عيونٍ مثِل عين الدمانيّه حورا هَدَبْها مظلّ ودعْج قتّاله
كاسِنّك الحِسْن واوصافك خياليّه ومن راد يوصف جمالك أيتهيّا له

.
.

لك عندنا قدر

إهداء إلى الشاعر خلف بن سيف القمزي

يا "بو حَمَدْ" غايب عن العين والدار ما ادري تغلّي منك والاّ قطاعه
يا كَمّ لك في القلب حشمه وْمقدار وتكفي زياره منْك لو ربع ساعه
لا تْوَضِّحْ الأسباب لو صار ما صار ما لك عذر عندي ولا لك شفاعه
ياما مراسيلك لنا تلفي كْثَار وياما بطاروقك تلمّ الجماعه
واليوم من دونك غدت قفر الآثار والدرب طَوَّل بك وطال اِّتسَاعه
ودّي بجلستكم مَعَ شَبَّةْ النار والشِّعِرْ من شخصك نحب استماعه
مثلك خبير الشِّعر فاهم وْصَقَّارْ تِدْهَلْ مراقيبه وْتَلوي ذراعه
بانْشِدك عن أمٍّ وَلَدْهَا مَاْ هو بَار في بْطنَهَا لكنّ يزْعِجْ سماعه
لا له عقل يوحي ولا يملك ابصار ومن فعله بْهَا تنْتِجْ لْنا بضاعه
وبانْشِدك عن بنتٍ على راسها نار وماها بها لكن ما به نفاعه
وعن رجل نايف له معزّه وْمِقْدار يملك شراع ولا يفيده شراعه
وعذرا على اْثَرْهَا من كْبَار وصْغَار فيها المعزّه والمذّله رباعه
تشبه على الدنيا بها الفلْك دَوّار وتلقى خبرها منتشِرْ في الإذاعه
وْلا قصِدَنا إلاّ السوالف والاشعار ولك عندنا قَدْرٍ منيف ارتفاعه

.
.

الموعد

جيتك على الموعد ولا جيت وش عن لقانا مانعنّك
كَنّك عن الموعد تخلّيت يا ويل يَاللي عاشقنّك
ليتك لصوت المغرم أصغيت أوتار صوته يعزفنّك
كل حرف منّك يستوي بيت وارْبَعْ حروفٍ ينطقنّك
ياما على شانك تحدّيت سود اللّيالي واسهرنّك
منّك أنا لا حَيّ لا مَيْت لا مَيتْ ولا حَيّ منّك
يوم بْنِظَرْ عيني تربّيت وامرت بامرك طايعنّك
ليش التغلّي والتعنّيت آهات صدري ما كفنّك
لو نِكْ تباعدت وتقاسيت لك في المحبّه عكس ظنّك
إن كان لي يوم وتمنّيت شوفة عيونك طالبنّك

.
.

"عزّام" مع التحية

عزمت أعَزمْ ومن عَزمْت عَزمْ بي عَزام عَزم يقول الشعر واعزم به
حيّيت ركب الحيا ممّا حوت سحبي يا حَيّ به عد ما حيّا الحيا ركبه
الشعر عشق القلوب وْشَاعِرِكْ شعبي ما يعشق الشعر لى ما يشعِرْ بْشَعبه
وانا بْنباك ونبا من ناب متنبّي أنبيك واللي ينبّيك النّبا نبّه
كلامك أحلى من السكّر على قلبي عِيْده على شان أعيد العيد من حبّه
لاجله جنيت الجمان وجيون الغبّي أدلج لاجل لجّ داجي تنجلي حجبه
بانشدك عن شاردٍ تنشا به السحبي أوّله عندك .. وتالي رمزه أوّل به
تحسِبْ حسابه مع انّه من سحب حسبي ويحاسبونك عليه وحسبته صعبه
والعزم عزمك واذا عزّمت عَزّمْ بي واعزم من اعتاز لك عزّه وعزّم به

.
.

سرية فكر

سرى فكري وانا (فزّاع) والدنيا بها ضَجّه واظنّ ان الشِّعِر هاليوم يبى يقضي على حاجه
سرى بْليلٍ وفي بحرٍ يعانِد غزره وْلجّه يقاوم جرّة التيّار ولو تطمي به أمواجه
بحور غْزار يبغيها لأصعب دَرْب متوجّه يبى روس العلا وْيقدر على صعبات اْلِمْواجه
يطول الدرب كم بيطول وحرف القافيه غَلْجَه ولكن يقدر ان يبني بيوته تصبح أبراجه
على وصف الجميل الفاتن الساحر لنا حِجّه مادام الحب هو ليل المتيّم أو هو سْراجه
عنودٍ رمشها سَلْهَم وعينٍ ناعسه دَعْجه وخدّ مْورّد ومِنْوِر طبيعي دون مكياجه
ووجهٍ من سنا نوره على البَهْجه ضفى بَهْجه مزونٍ غيثها البسمه ليا من تضحِك حْجاجه
وميدولٍ على متنه كما داج الدجى هَجّه على عودٍ كما قزّ الحرير الناعم انتاجه
جميل وكل ما فيه الجمال سْكوته وهَرْجه واذا للزين منهاجٍ حبيبي الزين منهاجه
أهو تاج الجمال .. إلاّ مداه اللي تبَعْ نهجه وانا اشهد بانّ حِسْن الفاتنات لْصاحبي تاجه
تصدّق من كِثر حِسْنِك تصيب بعالمك رجّه ولي تبغي له احراجٍ بحسنك تملِكْ احراجه
حبيبي لا تلوم القلب ، لوم عْيونك الدَعْجَه بها حاجه ولا ادري وش بها لكن بها حاجه
دخيلك يا هوى بالي حبيبك في الهوى نَجّه ترى حبّك سبب همّه وصدّك سبّة ازعاجه
واذا المطلوب مِ الخَفّاق منّي يطلب الرِفْجَه ورِفْجَه ما أردّه دام هذا القلب محتاجه

.
.

يتبع

.
.

سيّدي

(من يجيب (الهَاْتْرِكْ) بْـ (سَيح السَّلَمْ ومن لعزمه تنحني روس الرجال
غير ذاك اللي رقى روس القمم نال مطلوبه ولو حتّى محال
(بـه قليله يــا مـلا كلمة (نِعِمْ دام فعله صار من ضَرْب الخيال
الشّهم ولد الشهم ولد الشهم زاكي الجَدّين من عَمٍّ وخال
سيّدي سِيْد الشجاعه والكَرَمْ والشهامه ما بها قِيْلٍ وقال
نادرٍ ما له شبيهٍ في الأمم والنداره ما تجي إلاَّ بْقلال
العدو من هيبته يوقف صَنَمْ وما تماري قوّته صُمّ الجبال
والله انّه للنصر أصْعَبْ رقم والشهاده عند هذيك التلال
المهم الفوز والشيّ الأهَمّ إنّه بفوزه غدا مضرب مثال
طالبنّك سيّدي وتقول .. تَمّ كافيٍ .. وافْتَح لغيرك هَالمجال

.
.

هذا الشبل من ذاك الأسد

مهداة إلى سمو الشيخ راشد بن محمد بن راشد آل مكتوم، بمناسبة
حصوله على المركز الأول في بطولة رئيس الدولة للقدرة بسيح السلم

طيّبت فال الفوز يا طيّب الفال يا (راشد المكتوم ) ما فيك حيله
الفوز بك ياعالي الشان يختال والفوز يرغب كل راعي طويله
مبروك ما دنّت لك مزون الاقوال ومبروك ما غِظْت بْمزونك مخيله
يا زاكي الجَدّين من عَمٍّ وْ خَال يا بدرنا اللي في الدجى نستخيله
يفداك عَزم اللي تمنّى ولا نال يا شوق ربّات العيون الكحيله
لك مجد قبل .. وْمجد حاضر ولازال وامجاد لك في المقبلات الجزيله
يا (راشد) اتْعَبْت المدى والمدى طال واللي تِبَعْك أتْعَبْت عَزمه وخيله
كم سقت خيلك بين رمله وْمِسْيَال وشَيَّلتها بالحزم ما لا تشيله
يا شبل من تفخر بطاريه الاشبال شبل الأسد لي ما يِحَفْل الهزيله
هذاك لى تَضْرِبْ به الناس الامثال سهل التمثِّل به ويصعب مثيله
فارس يِهزّ بْهيبته ألف خَيّال ظاري على حمل الحمول الثقيله
يدهل بغاياته على كل مدهال دون المعالي ما تردّه عضيله
وانته على درب العلا قايد أبطال والشبل من ذاك الأسد له حصيله
أشْهَد شهادة حَق والحق ينقال إنّك على الطولات ما في كحيله

.
.

لعبة زمن

لعب الزمن ما هو مثل باقي العاب إلعب على كيفك واذا تروم لا تْتوب
بَيْجيك يوم وْتندفن تحت لِتْراب عقب الدفن بَتْعَرْف وش يعني لْعوب
لو نك فَتحت أبواب لك غَالقٍ باب ولو نك تعرف العيب العيب عَذروب
بديت أكتب واجلب كْتاب بكْتاب آخذ معَانيهن واخلّيهن بْصوب
إذا الشِّعر يا ناس قِدْ جاب ما جاب وان جاك شِعري بالفعِل جَاك مَكْتوب
هذا وانا أرقى على كل مرقاب أسري بليل الضدّ من فوق عَرقوب
هذا وانا أشّر وهي تطير أسراب بيض الحَمام تطير ما تحمل ذْنوب
هذا وانا تايب وإبليس ما تاب هذا وانا أنعَت وهو ضَيّع دْروب
هذا وانا أضحَك وهو يضحك بْناب ثوبي ستير وصاحبي عَاري الثوب
هذا وانا اعدّ الخَطا عَد لِتْراب ينعد كيف انعد وهو كان محسوب
بعض البشر تحسب على كيف الاسباب وبعض البشر من دون سِبّه ومطلوب
كلٍّ يحَسْب احساب وآنا احسب احساب وْكلٍّ يجي باسلوب وآنا لي اسلوب
بَابٍ فتح من بَاب والباب كَذّاب بَابٍ إذا يفتح ترى الباب مَكْذوب
هذا وانا اغنّي وانا اقول سَحّاب سَحّاب يَمطر صوب وانا أمطر بْصوب
مثل العروق تجيس وتدق الاعصَاب أو مثل سَاحِر طار في الجو مجلوب
من هو يأمِّن يمشي بْليل في غَاب بعض العَسَل يا صاحبي سَمّ مَشْروب
هذا هَدفيه صبته وْصَاب بصواب صوب الذي صَوَّب ولا صاب مَصيوب
بحرٍ غزير وْطامي البحر عَبّاب ونَارٍ تطَفّي نَار من حَرّ لاهوب
حَدٍّ عليه عيون والناس رقّاب وْحَدّ اختفى لو كان بالحيل مَرقوب
حَدٍّ يشلّ سلاح وْحَد شايل حْراب حَدّ يعشق شْروقٍ وْحَد يعشق غروب
حَدٍّ يشيل الهَم في ضَرب الاصحاب كل من ضَرب في يوم له يوم مَضروب
أنا معَادِل آخذ الحُب لاحباب وْكلٍّ يحب الطيب .. الطيب محبوب
قالوا سَهَل إنّي أنا أفتح الباب وانا هويت الصعب لو دارت حْروب
لعبَه وانا ألعَب على كل الالعاب طبعي أنا غَالب ولا آكون مَغْلوب

.
.

معذور

البارحة قطر الندى أوشى على العيدان قلت الله أكْبَرْ ما على بعض الوشاةْ قْصور
قلت الله أكبر كيف أرَجّح كفّة الميزان كيف أقْدَرْ أنْظمهم وانا باثنينهم مَجْبور
مَسّيتهم بالخير وْ حِنّا حَزّةْ مْسَيّان )يا صباح النور( لكنهم عن عمد قالوا
الأوّلي معذور لاْن القلب له ظميان والثاني أظماني .. ولكنّه بَعَدْ مَعْذور
لو أكْتِبْ الأشعار انت تْكون لي الاوزان ولو تنكسِرْ الاوزان يحلى بك وزن لِبْحور
من شاف حسنك ينكسر طرفه وهو حَيْران يرتد من دونك طرف عينه وهو مكسور
سبحان لى ميّزك عن كل البشر سبحان الرمش وارف والعيون الحور تلعَبْ دور
والله انا شفتك ولا شبّهت بك إنسان ظنّي أخذت الزين كلّه من بنات الحور

.
.
أمجاد

الشِّعر له أمجاد والبيت له مجد ومن هو يروم يوصِّل الشِّعر مجده
الشِّعر له ميزه وفي ميزته عد ياما شويعر إنجلب شِعِرْ ضدّه
لا تقسم الخفّاق القلب ما يْبِدّ وراعي البدايه في هوى الشوق بَدّه
في فرق بين جْبال وفي فرق في النَّدْ سهلٍ رقاها بس في الفرق مدّه
واذا تسنّ السيف في موعد الحد ردِ السيوف ورد سيفك في غمده
خَلّك شجاعٍ لا تْعَرِفْ حر لا برد لا برد حرّه ولا بَعَدْ حرّ برده
وانا فهمت الشِّعر هو ما يبي قَدّ إنت الذي ترفع له الشِّعر قَدّه
إن فاض سيلك فايض السيل له سد وسدٍّ يسدّ السدّ وسدٍّ يسدّه
وان كان المطوّع ولا طاع وارتد يا هي حسافه كيف طايع وردّه
ما يردّه إلاّ ناعس الطرف والخد ودّه يحاول يوصل الخَد.. ودّه
إن جيت أطالع عيني بْعينه تسد بس يكفي انّي شفت عيني بخدّه
هذي مشاعر شوق والحب والود يبغي يغيب بْعيد والشوق عنده
في بسمتك (عَزّام) يتفتّح الورد كن المطر نازل على أوراق ورده
يا ما أضيع بشوق في ليلٍ اسود ويا ما يضيع الليل في شَعَرْ هَدّه
يلعن مشاعر لا تجي مَدّة اليد يوقف خفوقي يوم من بس مدّه
هذا بَحَرْنَا يْسَاوي الجزر والمد كلّي تساوى بين جزره ومدّه
الشِّعر له أمجاد والبيت له مجد وهذا يروم يوصّل الشِّعر مجده
فاءٍ وراها زين ومن عقبها مَدّ وعينٍ وْرِدّ الزين وْعَ الزين شَدّه

::

::

قلب صادق

لا تقول الحب في القلبين مات هذا توّ الحب كيف انّه يموت
ولا تقول ان الشِّعْرِ ليل امنيات وانت توزِنْ بيت وتكسِّر بيوت
الشِّعْرِ نبض القلوب الصادقات كم رفعنا به على طاريك صوت
لا تخلّينا على بحر السكات الكلام أحيان أفضل مِ السكوت
خَل ما بينك وما بين الوشاة (مثل ما بين (الرباط) و (حضرموت
دامني لجلك نذرت المقبلات لا تخيِّبْ لي ظنون ولا نعوت
خِذْ مشاعر قلبي الصادق وهات ودّ صادق واحذَرْ أقوال الشموت
احْذَرْ احْذَرْ والدهر له نايبات واحْذَرْ انت تطيح شَبْك العنكبوت .
.
.
.

طاحت الحيّه

هلا باللي سبى قلبي واخذني حسنه بقوّه سَلَبْ روحي واخذ صبري وأنفاسي من يْديّه
أحسّ انّه لعب بالقلب لعبة شاطر وْمَوّه يبعثرني.. ويجمعني رجا واحلام ورديّه
إذا نوّر ظلام الليل عرفت ان الفجر ضوّه تبسّمْ من جبينه مبسم الصبح وضحك ضيّه
واذا سلهم برمشه طرت من جَوّي إلى جوّه ورحّب به خفوقي غصب عنّي قال يا حَيّه
أثاريني بحسنه طحت وانا اظن الهوى توّه فكيف ان الهوى توّه وانا غرقان في طيّه
تعلّقته وصار اليوم نوّ القلب من نوّه مع انّي قبل هذا اليوم كانت نيّتي نيّه
قبل يطري الحسن حسنه لفظ قبل اسمه سْموّه تسامت به سنا الحسن وسرت له سحب وسميّه
تقول ارفق بمن حَبّك وعقب اللي تبي سَوّه ترى ميْتك إذا شافك ترد الروح به حَيّه
حبيبي خاطري عن ما بدا له عبّر وْنوّه ومن شرواك يفطن وانت شمس الخاطر وْفَيّه
إذا كان الحيا يمنعك.. ما تمنعك لِمْروّه واذا خايف من الحِسّاد قِلْ لي.. طاحت الحِيّه

::

::

بحور

صغت المعاني من بحور الهواجيس واخترت منهن من صفا نقو الألماس
بيوت شِعْري يسبقنّي مراميس وبهن أحرّك نبض قلبي والإحساس
سايرتهن يوم الخلايق مناعيس ونظمت نظم القاف ساسٍ على ساس
واجدّ في سيري على ضمّر العِيْس واسري بليله سرمديّه بالاغلاس
ما همّني طول المدى والمراويس ضاري على فعلٍ يحيدونه الناس
أغوص قوعٍ ما تجيبه مقاييس آخِذْ من الدانات ما يْصيبني ياس
وان هيّضنّي قايدات المكانيس أحسّ في قلبي شرى دَقّ الأجراس
أنا الهواوي ما على القلب تحميس أطْلِقْ عنان الشوق وأقول لا باس
طبّ الأمور المقفيات المناحيس وانظِرْ بعيد وطاوِل النجم بِقْيَاس

::

ندى الريحان

يوم أقْبَلت تخطب ندى الريحان لطف وخفّه ما كنّها إلاّ الصبح يوم أقْبَلْ يجرّ أقدامه
تحفة حسن من حولها غيمة غلا ملتفّه كل الحلا محبوس بين أقدامها والهامه

كَنّ الثغر منها نهر والاَّ الشفايف ضفّه ما شفت في عمري نهر له ضفّةٍ بَسَّامه
يحتار فيها من نظر لو هو صِدَقْ في وصفه ويكذّبه لي ما نظر واللي نِظَرْ ما لامه
تحفة حسن لاقت بعين اللي يعرف التحفه ويسوم عمره لاجلها لولا الغلا ما سامه
بعض الصدف فيها حلا يا ما حلا هالصدفه وشلون ما يرتاح لي صادف فتاة أحلامه
ويزفّها بايقاع هادي للحنايا زفّه ويعيش معها ما بقى له من جميل أيّامه
وِيْعَاتِبْ أوَّلْ سِيْنها لانّه تصدَّرْ حرفه مع ان أوَّل اسمها سينه تصدَّرْ لامه

::

::

يتبع

::

الفصول الأربعة

أنساك كلمه مالها أيّة وجود بمرجعي والقلب لامنّه نوى غيرك حبيبي بامنعه
تنتابني ذكراك ما بين الوعي واللا وعي ما كنّك الاّ بحر حلمي والمشاعر الأشرعه

من وين تطلع كنّك الاّ تقول يا شمس اطلعي يتنفّس الفجر بنفس حسنك ويشرق مطلعه
مع إن فرعك لو رميت الشمس به عيّت تعي إن الدجا يسري لها من دون ما تتوقّعه
إن الدجا يكنز عبيره للنسيم المطلعي كلّه على شان النسيم المطلعي يلعب معه
يمتد ليلي واشعلك شمعة غلا بين اضلعي ويمر بي طيفك ويتناثر بصدري واجمعه
تحتاج تتعبني وأنا أحتاج لك وأنته معي بعض المشاعر تتعب المشتاق لكن ممتعه
موقعك من قلبي تدلّه بس حدّد موقعي وبعدين خذ قلبي وفي دنيا غرامك ضيّعه
وإن طاب لك شوقي وطاب لصوت همسك مسمعي القلب لك والشوق في عروقي بكيفك وزّعه
القلب ملكك والفصول الأربعة من مطمعي دام التقت في مبسمك كل الفصول الأربعه

::

::

مدخل غرامي

القلب شال الحب والحب شاله مدخل غرامي والأحاسيس حوله
وضاع الفكر ما بين حاله وحاله واسهل حلوله صارت أصْعَبْ حلوله

الحِسِنْ لي يفرض علينا سؤاله كيف الربيع امتد لاربع فصوله
كيف ابتداه الحِسْن ثم انتهى له يا لين حتى الحسن منّه خذواله
وانا اتخيّل في خيالي خياله فرصة عمر تحت ابتسامة طفوله
غرٍ صفا حسنه وقلبي صفا له سهل التمنّي بس صعبٍ وصوله
يحتار فيه اللي يوصّف دلاله ويهين به لي عن جماله حكوا له
يخجل جماله من صفاوة جماله ويغيظ ربّات العيون الخجوله
يمشي معاهم بس كنّه لحاله معهم ولكن كن هم لي مشوا له
والي تعرّض في مرامي نباله والله ما يكسب ولا ربع جوله
عادل ولكن ما برمشه عداله يظلم مجبّينه برمشه وطوله
أصلاً جنوني بس في حَب خاله وشلون لا باوصف تفاصيل زوله
إن قال صَدّي.. قلت: لله قاله وان قال وصلي قلت: بالله قوله
هذا الذي قلبي من الشوق شاله مدخل غرامي والأحاسيس حوله

::

::

قراءة مدى

دنيا وداني مواطيها ترفّعها والقرم يرقى بعزمه عن مواطيها
القرم يفرض عليها أمر واقعها يجرح دروبه لاجل يرجع يداويها

يرقى واذا ضاقت دْروبه يوسّعها ويعق فيها مع انّه ما طمع فيها
لان المطامع يثير الشك دافعها مثل الفَعَى يوم تسمع ناي حاويها
لا هو سمعها ولا قصده يسمّعها ولا قصده إلاَّ تناظر ميل راعيها
يطلع بطلعه ولكن ما يطلّعْها بعض المظاهر تزخرف لك مراميها
وشلون ألوم المظاهر والعذر معها والعقربي ما قدر يكشف لياليها
أهل المطامع تغطّي لك مطامعها والوقت يقدر يبيّن لك مغازيها
من حكّم الظن في الدنيا يضيّعها ومن حكّم العقل يكسب في تواليها
ومن أشعل النار لا يامِنْ مواضعها (النار ما تحرق إلاَّ رجل واطيها)
والنار أطفت وانا ما اريد أوَلّعها واذا ارجعت ولّعت أرْجَعْ واطَفّيها
والبسمه اللي لذيذ الزيف وزّعها أقرا مداها واترجمها وامشّيها
وِحْروف ما بين الاسطر سهل تجمعها لكن من الصعب تستوعب معانيها
قليل من يدرك الفرصه ويصنعها يجري بمبداه والدنيا يجاريها
بعض الفرص تغتنمني لاجل أضيّعها واصنع فرص تغتنم من طيب راعيها
هذا وانا اعزّ نفسي في تواضعها واقدّر الناس قاصيها و دانيها
والناس ما تحفل اللي ما يصانعها وتعيب في بعضها لو كان غاليها
تنسى وتذكر علوم اللي يطابعها واذا اختفى يختفي عن ذكر طاريها
تتبع خطا من هو يْحَاوِلْ يمتّعها وتقول ما لا تكنّه في خوافيها
والناس تشكي لحاميها مواجعها وشلون لو صار حاميها حراميها

::

يتبع

::

فزّاع» يضع إحدى روائعه على طاولة الشاعر محمد المر بالعبد..مع «كسرة الوادي»..
كسرة الوادي.. ومحمد المر بالعبد

يموت يْموت لي فاتِك وتحيا لك عروق جْداد غريبه كيف يا (محمّد) بنفس الروح تحيا لك
على الله مابقى إلا أخلّي العقربي يعتاد على ليلي لعلّ الليل لو مظلم بيصفا لك

مزون وْبرْق سحّاب ومطرها في سما رعّاد تشوف مْزون تمطِر لك غلا لكن تهيّا لك
علوم الوقت تاخذ من علوم الناس قل أو زاد تضيّعك بْهواها ثم تضحك لك وتلجا لك
زمانٍ مَرّ في الدنيا على (عنتر) ابن شَدّاد يا (عنتر) ما اعترفنا بك ياْلين اثبَتّ بافعالك
يا كم واحد على خيله يزرّ شْداد فوق شْداد يزرّ ابطانها والفذّ يضحك والضلِع هالك
يقولون أعلى ما بالخيل تركبها عناد عْناد وانا اقول أعلى ما في الخيل في بالي وعلى بالك
أراضي واسعه تجذبْك وانته ما لك إلاّ بلاد بلادٍ عِرْقها عِرْقِك بالاحرى عمّك وخالك
عرفنا (كسرة الوادي)، ولكن لو يفيض الواد نصنّع لك مساييلٍ تركناها وْسمَحْنا لك
نحِن لا من بغينا الشيّ صرْنا للسناد سْناد نحِن مَدّك نحِن جَزْرِك نحن بَحْرِك نحِن فالك
نحن منّا الكرم منْبَع ويا كم بابنا ورّاد نحن لو جيتنا ضيفٍ قبِل تدخل وقفنا لك
يموت يْموت لى فاتك وتحيا لك عروق جْداد قبل تنْشِد عن احوالي أقوْلّك إنت وش حالك

::

::

يا مسا السكّر على الغصن الرطيب يعل تسقي ديرته وبل السحب
زارني والفكر ساري سري ذيب قلت سبحان الذي ساق ووهب
قلت ياليل اللقا والشوق طيب طيب لاصحاب الحسب واهل النسب
القوافي تنتخيني قبل اثيب وما على سنّي من اشعاري عتب
إن بدعت الشعر سِنّي ما يعيب من صغر سِنّي وانا قافي عجب
القوافي بَدعها حظ ونصيب بس انا حظّي على القاف انتصب
إن صعب قافي ترى فالي يطيب مطلب افكاري هو القاف الصعب
دامني في صغر سِنّي قبل اشيب أملي الدنيا زغاريد وطرب
ما عليّه لو غدى شكٍ وريب وش على الصادق إذا الحاسد كذب
دام فعله دون قولي ما يصيب كيف لو فعلي على قوله وثب
ظنّ بي ظنّ الحسود المستغيب وابتليته بلوة السيف الحَدَب
قمت اجيب اللي عجز عنّه يجيب ما قدر يكشف عن عروق الذهب
كيف الوم اللي نظر عينه عطيب ما يميّز بين زرفال وخبب
المعاني بدع فكري واللبيب يدري ان الراس ما يتبع ذنَب
الشعر ماهوب لامثالي غريب لاني بحاجة من احتاج وكتب
وارثنّه هوب في حاجة نسيب الضعيف اللي إذا احتاج انتسب
وانت يابو نصّ ظن ونصّ عيب لا تسال الكرْم عن لون العنب
لا تسال الشط عن موج الغبيب البحر مايرحم صغار الخشب
والعرب ما تفخر الاّ بالنجيب واشهد انّي عندهم عِزّ الطلب
وانت يالمحبوب لك ربّ حسيب لا يغرّك من تباعد واقترب
وانت لو تخطي على قلبي مصيب صابني من بَيّة عيونك هدب
إن رماني رمش عينك يالحبيب جرحك علاجي وانا ادوّر سبب
إسأل مجرّب ولا تسأل طبيب العَرَب ما تفخر الاّ بالعَرب

::

::

خِذْ من الشاعر كلامه

لا تحسِبْ وْرود تنثَرْ لك غلا وتفلّه والبَحَرْ عشرين وِنْجومه وْضِحْك هْلاله
تعتقد إنّي أنا مَيِّتْ .. وانا لا واللّه آنا لا ميّت حبيبي لا ولا اللّه قاله
لى يبي يقرَبْ خفوقي ما يجيني بْزَلّه زلّةٍ أسْمَحْ لها ومن عقبها بِزْواله
كان عندك هرج بتْقوله لقلبي قِلْ له وش علينا بْهَرْجة المسكين واللى قاله
ما عرف شَيٍ في بالي لا بغيت أوصل له ويذكر اسمي يومها وبحلّه وبترحاله
من يحب بحب ضايع قلت اللّه شلّه ضاع واللي ضاع عندي إحتياط بْداله
والله لا احذفه أنا ويصير حرف العِلّه يالين ما يضحَكْ عليه ابليس قبل عْيَاله
لي (مَسِجْ) يكتب في بالي وعقبها أرسل له ويدخل بْشاشات حبّه وينحرِقْ جَوّاله
من خباله إلْخباله نيّةٍ ناوٍ لــــه ولا بغيت ازيد شاف خْبال غير خْباله
أرفعه وارجع أذلّه وارفعه وآذلّه لين أسمع مرّتين بأذني يا هي حاله
ولو بغاني هو رقى لي والاّ انا ما انزِلْ له لا له انزِلْ لا له ولا ألف من أشكاله
ذا طريقي من عرفتك والطريق تْدلّه الطريق اللي تدلّه لازم ان تسعى له
خِذْ من الشاعر كلامه والاّ حبّه خَلّه أنا آحبّك .. لا حبيبي لا ولا اللّه قاله

::

يتبع

::

فهمت وما فهمت

فهمت العشق لى يطلب من الإنسان ذَرْف دْموع فهمت العشق لى يطلب من الإحساس كل أوجاع
فهمت العشق لى يفرض على الإنسان يعيش بجوع (فهمت وما فهمت اللي سكن في داخله (فزّاع
فهمت العشق بحر أحلام غزير غزير بليّا قوع فهمته بحر أحلامي بحر عشقي بليّا قاع
فهمته نبض فهمته لمس فهمته روح ولا مسموع فهمت ان العشق فرصة عمر متخبّيٍ بِقْناع
قريته درس فهمته عِلْم أعيشه روح بنور شْموع بكيته دَمّ جرحته لا عرفت انّ الصراع صْراع
فهمته.. له قوانينٍ ولكنّه بلا ممنوع فهمته أصعب دْروبٍ مشيناها بلا مرجاع
فهمت ان العشق غصن الوعد في خافقي مزروع فهمته ملجأ الإحساس ولكنّه بَعَدْ ضيّاع
فهمت ان العشق أحيان يشبه فِ النزول طْلوع عيشه في اختلاف الوقت مثل ما تختلف الاصباع
فهمته جامع ويجمع وجمّعنا بلا مجموع بلا مرسى بلا مينا بلا شاطي وبلا مرباع
فهمته عالم الوحده شعارٍ رايع ومرفوع فهمته كوكبٍ ثاني.. يبيع الكلّ ما ينباع
فهمت العشق لى يطلب من الإنسان ذَرْف دْموع فهمت العشق لى يطلب من الإحساس كل أوجاع
فهمت العشق له أنواع وعشقي من فريد النوع (فهمت وما فهمت أَصْلاً وش اللى داخله (فَزَّاعْ

::

::

ديـمــقــراطــي

تصدّق ما بقى له شيّ في باله من الأفكار عجز يخفيه في صدره كلام الحق ويلمّه
عجز يقطف ورود الفل ويظلم وردة النوّار لاجل ما يكسب الآذان يطري له ولد عمّه
إذا ما عاش ليله ليل ولا عاش النهار نهار ليا صبحه غدى ليله ونور الصبح مظلمّه
واذا ما عاش مستقبل يعيش اليوم بالتذكار يعيش الحاضر الماضي يهمّه بس ما يهمّه
يمقراطي يعبّر عن كلامه عاش باستقرار يومّ القلب لافكاره واذا ومّ الفكر ومّه
وانا ما جبتها لك سحب إلا في سما الأمطار سحابٍ لا بغى يمطر دموعه إندفق دمّه
سحابٍ من دموع الموت هالك يروي الأنهار روى نهره ونبت وردٍ عجز يقطف ولا يشمّه
جبل صامد قوى عزمه كبر حتى بدى ينهار عقب ما كان في العالي تهاوى من على القمّه
بدى يصـغر يالين أصبح حجر يلعب بيدين صغار تبعثر والطفل ينثر حصاه ويرجع يلمّه
نصيحه قلتها إحذر تعاكس جارف التيّار صعب تامّن في بحر الوقت لاموجه ولا يمّه
ونصيحه لا تذيكا لك على ناس اذكيا شطّار ترى بعض البشر تحسب بلا روح وبلا ذمّه
وانا لا ما عليّ الاّ أقول الحق مهما صار تريد الحق خذ قولي ولا تاخذ ولد عمّه
أنا قلت النصيحه لك واعيد الدار غير الدار وافاعيها تريّا بس لحظة غدر وتسمّه
أنا ما جبتها لك سحب إلاّ في سما الامطار واذا زمّ البحر موجه لك الله ردّها زمّه

::
::

فخر الأجيال

على وصف الرجال اللي تسمّى بالفعال رجال لفت بيض العلوم وبيّض الله وجه راعيها
لفت ما كنّها الاّ سبّق الخيل ان بدت تختال نواصيها النعوت وفي مناكبها.. قوافيها
قصايد والقصايد ما نساومها بجاه وْمال نعبّ بحورها وان هاج مزملها نرسّيها
إذا امتدّ الفكر وامتدّ ليلي والقصيد وطال توشّحت الشوارد ولبست الاشعار غاليها
كذب من قال ساعَفني عليها الجن يوم تقال أنا البس جنّها واصدر مواردها واروّيها
أنا وْلا فخر نجل الشامخ المتمرّس الريبال على وصفه تجاريني القصايد قبل اجاريها
على (محمد إبن راشد إبن مكتوم) طاب الفال وطابت لي قبل لا الزم قوافيها.. معانيها
متى قالوا صواريها المعاني.. ما هناك اشكال حرام انّي لمدّ شراعها لأكبر صواريها
على اكبر منبر ارميها ثنا وْعز وْفخر واجلال ما دام ان الثنا لأهله.. على اكبر منبر ارميها
لاجل قرمٍ غرس حلمه لشعبه واثمرت الآمال حقايق نبصر اوّلها.. ونتباشر بتاليها
حقايق واضحه من دون ابو راشد صعب تنطال تباركها القلوب وتبهر الناظر مغانيها
مغانيها تراود كل عطرٍ ما خطر ع البال واراضيها يراود كل عاشق فوع ناديها
أراضيها الخزاما والنفل والبختري والهال وما يخطر على بال العطر يزخر باراضيها
ولي فيها محب أسرف على قلبي وحط وشال طلب روحي وروحي منه فيها اللي يكفّيها
من اوّل ما عرفته والضلوع تجرّ له موّال ولا ادري نيّته بضلوع صدري وش تواليها
أنا محتار ما بينه وبين (دبي) بالمثقال يا أمّا (دبي) له تحلا أو انّه لي محلّيها
أو انّ (دبي) تحلا لان أبو راشد لها خيّال نعم والله وتسبق خيلها من سبق واليها
دبي) العِز من طيب النسايم عودها ميّال) تمسّي صاحب القدر ونحن باسمه نمسّيها
صدى داره بشرق وغرب وجنوب التقى وشمال قبض الاربع جهات يلين داره ذاع طاريها
طغى عزمه على وعر الدروب وله غدت مسيال تسيل الأرض لاقدامه وتفخر من مواطيها
غريبه كيف جادت به سنينه والسنين بخال؟ والاغرب كيف تضما له وهو بالجود يسقيها؟
لو ان المجد سهل ان كان كلٍ طال منه وْنال دروب المجد ودروب العلا صعبه مراقيها
طويل العمر ما جيت اعتزي في وصفك الأمثال ولكن المثايل تعتزيني بك.. والبّيها
يابوي ابشر ترى شبلك توارت عن مداه اشبال وثب فوق الدروب وسابقت رجله خطاويها
ورث عزمك وحزمك والخصال تجرّ طيب خصال مواثيقه على طرق المكارم بك يجدّيها
إذا شدّ الفخر لاجلك رحاله قمت اشدّ رحال على نهجك.. عشان افرد رحاله وارجع اطويها
واذا قالوا: من ادرى بالحصابي والوزون ثقال عرفت ان الوزون ثقال وانت ادرى بْحصابيها
على الدنيا جدال الاّ انت والله ما عليك جدال مع ان إيدك يجادل كل وادي سيل واديها
لو ان السحب تنشا من كفوف امست عليك ظلال وخرّت ساجده لاهل الثرى من جود منشيها
مكارمك المكارم والعطايا من بحرك جزال لو ان السفن تجري في يمينك ضاع شاطيها
يمينك كم لاحت وابرقت وابطت وهي تنهال ولا والله تدري عن يسارك كم معاطيها
وكم رجلٍ بصدره حاجه وجاك وقبل لا يسال عطيته.. كنّك ادرى بالصدور وْسرّ خافيها
وكم حلمٍ سبقته.. كان في عين الزمان محال تقول المقبلات افضل عليك اسرار باريها
يقولون اختصرت اجيال واقول انته فخر الاجيال !إذا الأجيال بك ما تفتخر.. من يفتخر فيها؟

::
يتبع

::
جنون الحب

لا جنون الحــــــب ينفع في بواد الإحتمــــــال
احتمال يكون ضايـــــــع واحتمــــــــــال إنــــــه يبين
الخيال أصبـــح حقيقة والحقيقة من الخـــيال
شوف يعني كيف بـــــاجر ضـــاع مــن عمر السنين
لا محبه يــا قليل الحــب مــــن غير اتصــــال
ولا تواصــــل بيننــــا يمشي علــــى مـــــــا تشتهين
كــــم عجزت أفهمج والله لـــو أفهم الجمــال
يمكـــن الإبـــــل تفهــــــم مــــــــــن قبـــل لا تفهمين
::
::
ثمــــار الهـــــوى
ليــتك معي يوم الهـوى نود نسناس من الــفرح والله ما تـدمـــع العـــــــين
نــاس على تعذيب ناس لهـم نـــاس وهــذا الهـوى ياخـــذ قــلـوب المحبين
لكن لا يطري على بـــالك الـــــيـاس ذوق الهــوى دامـك تعيش العمـر حـين
خذ من عطر ورد مع طيب الانفـاس واقطف من اثمار الهوى في البساتين
خلك مع حلو اللما عـذب الالعــــاس الجـــادل اللــــي فايــــق بكـــــل تكوين
لا تحط نفسك بين وعـرات الاطعاس وافهــــم بــأن الحــب عـذب مــلاييـــن
الحــب مــرجع للمحبـيـن واحسـاس والحب هـو فـي قـلب الاحـباب نوعين
ع كيف ما تبغي لك تـدق الاجــراس والشـــــاطر اللي يمـــلك الحب بيدين
::
::
ثمــــار الهـــــوى
ليــتك معي يوم الهـوى نود نسناس من الــفرح والله ما تـدمـــع العـــــــين
نــاس على تعذيب ناس لهـم نـــاس وهــذا الهـوى ياخـــذ قــلـوب المحبين
لكن لا يطري على بـــالك الـــــيـاس ذوق الهــوى دامـك تعيش العمـر حـين
خذ من عطر ورد مع طيب الانفـاس واقطف من اثمار الهوى في البساتين
خلك مع حلو اللما عـذب الالعــــاس الجـــادل اللــــي فايــــق بكـــــل تكوين
لا تحط نفسك بين وعـرات الاطعاس وافهــــم بــأن الحــب عـذب مــلاييـــن
الحــب مــرجع للمحبـيـن واحسـاس والحب هـو فـي قـلب الاحـباب نوعين
ع كيف ما تبغي لك تـدق الاجــراس والشـــــاطر اللي يمـــلك الحب بيدين

::
قصيدة ساجدة
لك حروفي قصيـد ولك قصيـدي شـعـــور ولك شعــــوري خفـوق نبضـه الحَيّ إنتـي
ولك غلا في صَميم الروح حَاضر حضور واشهـــد انــك بقلبي وْلا عـن العيـن غبت
يا سَـــنا الكــون كلّه والعــواطف بحـــور يا ظيـا العيــن ياللي في وَسَطـــها سـكنتـي
يا بَعَد كـــــل من لي يا أريج الزهــــــــور يا أعـذب حروف تظهر في كلامي وصمتي
يا شعـــــاع تحلّى وْلا على الـــنـور نـــور بـس مـا غيـر نـورك يظهـــر ليا ظـــهرتي
ويْا ملاكٍ خلـقـــه الله لعـمـري ســــــرور وش تفيد الحيــــاة بْــيــوم لا من زعَـــلت
أعتذر لك ياعمري ولو بعــــذري قصـور وانتي قدرك عَ راسي وْلا حشا بيـوم هنتي
إبسمي يعل ربّي يحفظـك م الشـرور تبتســــــم لي حـَيــاتي وقت فيه ابتسمـتي
ان زعلتي عَلـّـــيه كن كــــوني مهجــور وان رضيتــــي تسـابق ابتسامتي فرحـتـي
إنحنَـتَ لك قصــــيده ساجـــدة ع السطـــور كــثر مـا انتي بمَـكه يا اطـهر الناس طفتي

::
قدّها وقدود
صدق من قال يا محمــد بأنـك سيـف ما تنصــد مـرواتـّك علم خفـاق وفيـك المرجـله والجـود
يا بن راشد وابو راشد بنيـت امجــاد لك تشهـد تجـف أقـــلامي بمـدحـك,يحير العـد بالمعـدود
إذا مــنـك بغيـت الشــــي فــلا عنـه مــرد وبــد تطـول اللي تقـوله عـــز وانتـه قــدها وقــدود
أشــوف النجم ذاك بعيـد,و أنت من النجـم أبعـد ألا يا حظ أبو من هـو تكـون انته معه موجـود
إذا اسمــك يجي في الشعر يزيـد البحر مده مد يزيد الشعر في الشاعر تجيه أبيات دون حدود
مروض جامحات الخيل,مهدي المـوقف المشتد مفـرج كـربة المظلوم,وشـوق الفاتنات الخـود
أحـــد مثلك أنـا ما القى رجـل مثلك أبـد مـا حـد على شعبه سطـع نوره مثل بـدر اليالي السـود
أنــا لاجـلك كتبت الشعـر وفضلك سيــدي ممتد على طـول المـدى نبقى لشورك طايعين جنـود

::

وشفيه بالك بعيد وجالس تفكر بدري على الحزن توك في بداياتك
لاتحسب الوقت لي فاتك وتتحسر عمر الندم مايرد الوقت لي فاتك

لا تترك الدمع فوق الخد يتحدر حاسب ترى كل عمري فوق وجناتك
يانور عيني مادامك عيني بك تنظر حرام تبخل على خلك بنظراتك

ماشفت كيف القمر عقب الظلام انور بالضبط نفس الشعور ان شفت بسماتك
ان كان في خاطرك حاجه علي ابشر والله لاسوق العمر كله لمرضاتك

ماتدري انك اذا تكدرت انا اتكدر وافرح لجل فرحتك واشره لشرهاتك
عودتني ع السهر وامسيت ماتسهر ماغير طيفك يعوضني بسهراتك

احلى سنين العمر بلقاك تتعطر يادنيتي وابرك الساعات ساعاتك
يمر طيفك واضمك وارجع استغفر وارد اشوفك واقول الله محلاتك

::

أحلى زعل

جيب بزعل عليك .. وناوي بالخصام
كل ما في خفوقي .. بس ازعل عليك
يعني روّح واروّح .. واسري ليل الظلام
بس من يوم شفتك .. قلت برضا عليك
خل روحي بروحك .. هذا اغلى وسام
خل عيني بعينك .. خل ايدي بديك
ياشروق المحبه .. يا شموع الغرام
يا ورود بحياتي عطرها يهتديك
سلم برمش عينك .. هالتغلي حرام
ما تموت المشاعر .. دامني احتويك
انطبع في خفوقي اسمك بحرف لام
وفي عيوني عشقتك بحياتي ابيك
دامك بوسط عيني .. كيف عيني تنام
ودامك بنبض قلبي .. كيف ما افتديك
مد لي كف وصلك .. قولها بحترام
موت احبك واحبك .. موت انا اموت فيك
عاد تبغي الصراحه .. ما تويت الخصام
هذا قلبي يحاسب .. كل خطوة اليك
اقترب لك حبيبي بالغلى والسلام
يا حبيبي بصراحه .. حلوه غمضه عنيك

::
::

روح وروح

روح و روح ابعد بدنياك
يا متعب قلبي بصــدك
الدرب لي ضحك بكـاك
موت تكوى بنار حقـدك

كم في العذارا ناس شرواك
بحر الجــمال يفوق مدك
اليوم الي بيصـــير وياك
باكر معاك الايــام ضدك

تذكر زمان كــنت اهواك
انت الوحيد ومـــين قدك
ودك ادور غير لقيــــاك
ودك ادور غــــير ودك

انا نســيتك قبل لانساك
وحتى خـفوقي اليوم هدك
وبكل صــراحة واتحداك
اوقف مكـانك عند حدك

لقياك اصــبح مثل فرقاك
والبـــحر مده غير مدك
والـدرب لي ضحك بكاك
موت وتكوى بنار حقـدك
::
ماقــد عصـــاني
ما قد عصاني بعيشتي عمر دنياي.. ولو اني ابحكي كيف اقدر احاكيه
مادري وش اللي جاب هالحظ وياي.. كل من شكيت لشخص لقيتها فيه
بلوه اصلا كل هالعمر بلوه.. راضي و يا ليت اقدر اقول وافي
لا اني بعطشان و لا شارب الماي و لا اني انا ماخذ و اقول معطيه
لا اني انا المذكور و لا اني بمنساي.. مادري انا اللي غالي او اني اغليه
احسب خطاي و كل خطوه بممشاي.. امشي برمش رضاه لو رمش بمشيه
عشق و غرام الموت واحساس بلواي مادري لايه غربه اليوم بنفي
ذوبت لك عمري مثل سكر بشاي.. عمري الحياه يا سكر العمر اغليه
كل الحواس تقول وش جاي وش جاي.. خايف تضيع اصابعي باصبع ايديك
ابغي اشبه نظرتي ترسم خطاي.. حتى القصيده ما لقت اي تشبيه
مادري عاد تعود بحزن و الناي.. ماقدر اذمه ولا بعد اقدر اغليه
قالولي هذا حزنك و قلت (ش)الراي.. اية حزن اية اباشسميه
يومي انا هذا انا عشت دنياي.. ليل وراه الليل وش عقب يجي
عشت بزمان قلت للطير مولاي.. كل من رفع جنحاه فزيت لبيه
::
قرار فزاع

ما عاد لك في قلب خلك مكانه
لو كنت أمامه يجهل أنك عيونه
منته الذي تتملكه في زمانه
صعبه حبيبي عن رماتك حصونه
يامن تعود ع القدر والخيانه
الحب غالي لو انكم ترخصونه
ارخصت قدرك يوم خنت الامانه
وين الوفا لي عندكم تتدعونه
لقيت بك امن الغراشيب دانه
حصباه منك والآلي مخزونه
جمال حسنك ما يساوي بنانه
فتون زينك ما يحرك غصونه
عود يشابه لادن الخيزرانه
عازل هضيمه بين حيب ومتونه
أبغي وصوفه لكن الوصف خانه
حرت بجماله وتوهتني عيونه
لأني صويب مرهف من سنانه
عزاه قلب نازفات طعونه
يقولها لي قالها من كيانه
يحسب حسابه قبل لا يحاسبونه
::
البدر ـ مجاراة لقصيدة سيف السعدي
هذا هو البدْر والاَّ البدْر بِنْ عَمّه في عِلْم أنا والاَّ هذا الليل وِحْلومه
إن كان للحِسن قِمّه هذي القِمّه والاَّ عسى الحِسنْ كلّه فَدْوَةْ قْدومه
أقْبَلْ يضمّ السَّهَرْ وِعْيوني تْضمّه ما ادري من اللى من الثاني سَرَقْ نومه
كَنّ الوَصِلْ دِنْيتي يوم الوَعَدْ تَمّه وْكَنّ الوَعَدْ جَنّتي دام الوَصِلْ يومه
ما الوم من لامني في حبّه وْنَمّه حتى فوادي ولو يشكيه ما الومه
إذا تكلَّمْ يغار العطر مـِنْ فَمّه سوالِفِه كلّهــا بالمِسْك مَخْتومه
ياليت لى هَمّني مِنْ نَظْرته هَمّه عينه خذَتْ نَظْرتي قَبْل آخِذْ عْلومه
أبطا يسولِفْ عن الطيْب وْحَنَان أمّه ما يدري أنّه بقلبي وَثَّقْ سْهومه
ما يدري أنّه علاج العاشِقْ وْسَمّه وانّ القصايد على طاريه مَنْظومه
طالَعْت في ساعْته رَدّ وْقَلَبْ كمّه لا ساعْته قَصْدي وْلا قَصْدي خْتومه
ما قَصْدي إلاَّ الغَلا لى ساقني يَمّه أحيان ارومه وبعض أحيان ما ارومه
لولا الحيا والاَّ انا في ذِمّتي ذِمّه لاغْزي على روض رمّانه وْمَشْمومه

::

و السمووووووحهـ

بسم الله الرحمن الرحيم

مشكور أختي ع الموضوع

يعطيج الله مليون عافيه

الله لا يحرمنا منج

نترقب يديدج

تحياتي

فمان الله

مشكووور اخوي ع مروووورك

مشكووووورة أختي ع الموضوع

ناااااايســــــــ

يعطيج العافيهــــ

الله لا يحرمنا منج

من أختج >> !! كتكوته !! << Razz

شكرآآآ ع مروووورجـ

مستحيل أنساك

مستحيل أنساك هذا مستحيل مستحيل أنساك والله للأَبَدْ
من يعاشِرْ شخص مثلك ما يميل لا ولا ينوي على غيرك أحَدْ
يا جميلٍ في جميلٍ في جميل يا فريد اللون في جيدٍ وْخَد
ترتسِمْ في وجنتك شمس الأصيل وجمرتينٍ بينهن صَفّ الَبَردْ
والعيون الدعج والرمش الظليل ونور وجهك منّهن نور اسْتِمَد
تهت في حبّك مثل تُوْه الضليل وزادت جْروح الَحَشا جْروحٍ جِدَدْ
ولا ولا عن حبّك أرضى بالبديل وْكَنّ باقي الخود تكمالة عدَدْ
لي يسير الدرب يوصَلْ لو طويل أو مِثِلْ ما قِيْل من (جَدَّ وَجَدْ)

تسلمينـ الغاآآليهـ

ولاآ ننعدمـ منـ تواآآصلجـ

دمتيـ بود ^-^

مشكووووور خيووو ع مروووركـ